İcra başçısı sakinlərin evini sökdürür: Əraziyə texnika yeridildi (FOTO)
Gəncənin Nizami rayonunda sakinlər evlərinin icra hakimiyyətinə məxsus texnikalarla sökülməsi təhlükəsi ilə qarşı-qarşıya qalıb.
Bu barədə BAKU.WS-ə sakinlər məlumat verib.
Onların sözlərinə görə, ötən gün Nizami rayonunun icra başçısı Nizami Hacıyev “Bayan” küçəsinin sakinləri ilə görüşüb və bildirib ki, sənədsiz evlərin hamısı söküləcək.
“İcra nümayəndələri bizə deyirlər ki, 4 sot torpağı sənədləşdirmək üçün 2500-3000 manat ödənilməlidir. Əks halda evlər söküləcək”, – deyə sakinlər iddia edirlər.


Onların sözlərinə görə, 1993-94-cü ildən bu küçədə yaşayırlar.
“2006-cı ildə əhali sənədlərin verilməsi ilə bağlı məhkəməyə müraciət etmişdi. Məhkəmə qərar çıxarmışdı ki, hər bir evin sənədi verilsin. Lakin indi icra nümayəndələri deyirlər ki, məhkəmənin qərarını özündə əks etdirən sənəddə iki möhür əvəzinə bir möhür var”, – deyə sakinlər bildirir.
Hazırda “Bayan” küçəsində İcra Hakimiyyətinə məxsus texnikanın ərazidə olduğu və evlərin sökülməsi üçün göstəriş gözlədiyi bildirilir.
Məsələ ilə Gəncə şəhər Nizami rayonu İcra Hakimiyyəti ilə əlaqə saxlamağa çalışsaq da telefon zənglərinə cavab verilmədi.
Məsələni diqqətdə saxlayacağıq.

LEGİON.AZ