Arif Əsgərovun qohumu yataq dəstləri gətirmək adı ilə 4 milyon “atıb”
Bu gün Bakı Ağır Cinayətlər Məhkəməsində dələduzluqda təqsirləndirilən Rahib Hüseynovun cinayət işi üzrə məhkəmə prosesi keçirilib. 
“Qafqazinfo”nun məlumatına görə, hakim Mirzə Xankişiyevin icraatında olan prosesdə ittiham aktı elan edilib.
İttihama görə, R.Hüseynov “Azərbaycan Dəmiryolları” QSC-yə yataq dəstləri gətirmək adı ilə Qoşqar Zeynalovdan 4 milyon 300 min manat alaraq mənimsəyib. Digər zərərçəkən Namiq Mehdiyevə də pul “atıb”.
Lakin Rahib Hüseynov özünü təqsirli bilmədiyini deyib.
R.Hüseynov hazırda eyni maddə üzrə məhkəməsi davam etdirilən Emil Hüseynovun qardaşıdır. İttihama görə, E.Hüseynov Gürcüstandan izolyasiya və digər materiallar gətirmək adı ilə Emil Məmmədovdan 2 milyon 500 min dollar, Tural Hüseynovdan 382 min dollar, Namiq Mehdiyevdən 80 min manat və Mərziyyə Rzayevadan isə 19 500 manat pul alaraq dələduzluq yolu ilə mənimsəyib.
Zərərçəkən N.Mehdiyev bildirib ki, R.Hüseynov onun 30 min 500 manat pulunu mənimsəyib: “Rahib mənə dedi ki, biznes quracaq, qazancın yarısını mənə verəcək. 52 min verdim, sözünə əməl etmədi. Mən şikayət edəndən sonra pulun bir hissəsini qaytardı. Uşağım xəstələndi, qapısına gəlib pulumu istədim, “Allah şəfa versin” deyib geri qaytardı. Bu adama görə övladım şikəst oldu, amma o mənim pulumla xarici maşında gəzir”.
Məhkəmə prosesi noyabrın 1-də davam etdiriləcək.
Qeyd edək ki, təqsirləndirilən qardaşlar “Azərbaycan Dəmir Yolları” QSC-nin rəisi, sonra isə nəqliyyat nazirinin müavini olmuş Arif Əsgərovun baldızı oğlanlarıdır.

LEGİON.AZ