Müəllimi qəribə səbəblə polisə şikayət edən direktor NAZİRLİYƏ ÇAĞIRILDI
Direktorun şikayəti əsasında polisə çağırılan Lənkəran rayon Gərgiran kənd orta məktəbinin tarix müəllimi Həbib Əlizadə bu barədə sosial şəbəkədə məlumat yayıb.
Publika.az xəbər verir ki, H.Əlizadəyə polis bölməsində ona ciddi problem olmadığı deyilib: “Lənkəran şəhər Polis Şöbəsinə getdim. Bir xeyli qapıda gözlədikdən sonra nəhayət ki, əlaqədar şöbədən hər hansı ciddi problem olmadığını və işimə davam edə biləcəyimi bildirdilər. Ümid edirəm elə olacaq. Yeniliklər olan kimi bölüşəcəm. Operativ maraqlanıb məsələni nəzarətə götürdüyü üçün Təhsil Nazirliyinə, bütün sosial şəbəkə istifadəçilərinə, mediayaya dərin təşəkkür edirəm. Fəalliyyətimiz sizin dəstəyinizlə davam edəcək. Hər şey üçün minnətdaram. Sizin dəstəyiniz sayəsində təhsildə gözəl və böyük işlər görəcəyimizə ümid edirəm. Məlumat üçün bildirim ki, direktor hazırda Təhsil Nazirliyinə dəvət olunub, araşdırma davam edir”.
Qeyd edək ki, H.Əlizadə məktəb şagirdlərini Bakıya ekskursiyaya gətirmək istəyib. Direktor müəllimin bu istəyinə qarşı çıxıb. Aralarında yaranan mübahisədən sonra direktor müəllimi polisə şikayət edib.

LEGİON.AZ