Cəsusluqda ittiham olunan Rusiya vətəndaşları cənab Patruşevlə Ramil Usubova sual ünvanlayırlar
Cəsusluqda ittiham olunan Rusiya vətəndaşları Patruşevlə Ramil Usubova sual ünvanlayaraq, onlardan cavab gözləyirlər

Bildiyiniz kimi  sentyabrın 3-ü Rusiya Təhlükəsizlik Şurasının katibi cənab Nikolay Patruşevin başçılıq etdiyi nümayəndə heyəti ölkəmizə rəsmi səfər edib.Patruşev ölkə başçısı Prezident İlham Əliyev və ölkənin Təhlükəsizlik Şurasının katibi  Ramil Usubovla görüşlər keçirib. Rəsmi məlumatlarda  Nikolay Patruşevlə keçirilən  görüşlərdə əsasən  iki ölkə arasında ekstremizmə, terrorçuluğa qarşı mübarizə ilə bağlı qanunvericilik və əməkdaşlıq məsələlərinin müzakirə edilməsi və bu səfərin münasibətlərimizin daha da inkişaf etdirilməsi işinə töhfə verəcəyi qeyd olunur. Bu rəsmi xəbərdən sonra  bildirək ki,bu günlərdə  Rusiya Federasiyasının xeyrinə cəsusluqda ittiham olunaraq cinayət məcəlləsinin 274-cü maddəsi ilə məhkum olunub, Ədliyyə Nazirliyinin penitensiar xidmətinin 9 saylı cəzaçəkmə müəssisəsində saxlanılan Rusiya vətəndaşları Legion.az saytı vasitəsilə cənab Patruşevlə və Ramil Usubova müraciət  ünvanlayıblar.Onlar bildirirlər ki,Baş Prokuror Zakir Qaralov onları cəsusluqda ittiham edib ki,bununla  Rusiya Federasiyasını Azərbaycan dövlətinə qarşı təxribatlarda ittiham edir: “Əgər bu belədirsə, onda hansı qarşılıqlı təhlükəsizlik əməkdaşlığından söhbət gedə bilər?! Yox əgər bu ittihamlar əsassızdırsa, onda Baş Prokurorluq kimin sifarişi ilə Rusiya-Azərbaycan dostluq münasibətlərini pozmaq istəyir? Bizim fikrimizcə bu ən çox Ermənistan xüsusi xidmət orqanları üçün əlverişlidir. İki ölkənin Təhlükəsizlik Şuraları kəşfiyyat aparmamaq barədə qarşılıqlı anlaşma da imzalayıblar.Belə ki, MDB-yə üzv ölkələrin kəşfiyyat xidmətləri rəhbərləri tərəfindən xarici kəşfiyyat sahəsində əməkdaşlıq barədə sənəd 1993-cü il aprelin 4-də Alma-Atada imzalanıb.  Rusiya və Azərbaycan arasında bir-birinə qarşı kəşfiyyat fəaliyyətinin aparılmaması barədə mövcud anlaşma hələ də  qüvvədədir . Hətta Rusiya Xarici Kəşfiyyat Xidmətinin direktoru Sergey Narışkin də mətbuata açıqlamasında bəyan edib ki, MDB ölkələri bir-birinə qarşı kəşfiyyat aparmır, anlaşma qüvvədə qalmaqdadır. Lakin buna baxmayaraq, Baş Prokuror Zakir Qaralov sübut edib ki, Rusiya tərəfi bu sazişin şərtlərini dəfələrlə pozub. Burada bir sual doğur ki, əgər sazişin şərtləri dəfələrlə pozulubsa, onda bu əməkdaşlığın davam etdirilməsinin nə mənası var?!” .   Biz də, Legion.az saytı olaraq inanırıq ki, yaxın zamanlarda cənab Patruşevlə cənab Ramil Usubovun cəsusluqda ittiham olunan Rusiya vətəndaşlarının və onların ailə üzvlərinin çoxsaylı suallarını cavablandıracaqlar. Qarşı tərəfin də mövqeyini  dərc etməyə hazırıq.              


Legion.az


 M.Rasimoglu