Tramp: İranın heç vaxt nüvə silahı olmayacaq
“İranın nüvə silahına sahib olmasına heç vaxt icazə verilməyəcək”. Virtualaz.org bildirir ki, bunu ABŞ Prezidenti Donald Tramp öz “Twitter” hesabında yazıb. Yaxın Şərqdə vəziyyət İranın Silahlı Qüvvələrinin elit bölməsi olan İslam İnqilabı Keşikçiləri Korpusunun (“Sepah”) “Qüds” qanadının komandiri, general Qasım Süleymaninin ABŞ-ın zərbəsi nəticəsində İraqın paytaxtı Bağdadda öldürülməsindən sonra pisləşib. İran ABŞ-a cavab verəcəyini, Birləşmiş Ştatlar isə qarşı tərəfi müharibə ilə hədələyib. Qeyd edək ki, bundan əlavə, İran bəyanat yayaraq nüvə sazişi ilə bağlı öhdəliklərin imtinası istiqamətində 5-ci (sonuncu) addımı atdığını və nüvə proqramının icrası ilə bağlı bundan sonra heç bir məhdudiyyət tətbiq etməyəcəyini bildirib.