Şamaxıda qətl edilən yeniyetmənin dəhşətli hekayət
Qardaşı tərəfindən başı kəsilən Nəriminəni ölümün ağuşuna polis atıb

İki uşaqdan yazacağıq - bacı-qardaşdan. Həyatı 16 yaşında qırılan bacıdan, 17 yaşında barmaqlıqlar arxasına gedən qardaşdan. Əslində bu, nəinki bir ailənin, bir nəslin, bu bütövlükdə Kiçik Xınıslının, Şamaxının deyil, bütün Azərbaycanın faciəsidi - 17 yaşlı qardaşın 16 yaşlı bacısını qəddarlıqla öldürməsi...

Əvvəllər ayrıca bir kənd olan Kiçik Xınıslı hazırda Şamaxı rayonuna birləşdirilib. Kiçik Xınıslıda onların evlərini tapmaq çətin olmadı. Evin önündə bir neçə nəfər dayanmışdı. Darvazadan isə qara və qırmızı rəngdə iki şal asılmışdı. Onlar evdən gedən insanın ölümündən və gəncliyindən xəbər verirdi... Mənə elə gəldi ki, şalın biri qardaş, digəri də bacıdı... 

Yeniyetməni işə götürən onun haqqında polisə məlumat verməyib



Darvazanın önündə uşaqların atası Mahir İsgəndərov qohumları ilə bərabər dayanmışdı. Başı önə əyikdi... Ona yaxınlaşıb mətbuatda gedən xəbərə əsasən bura gəldiyimizi dedik. 
“Evimin birinci mərtəbəsi yoxdu. Yanaşı iki, ayrı-ayrı evlərdi. Biri böyük, digəri də kiçik. Evlərin arasında ən azı 10 metr məsafə var. Onlar bacı-qardaşdı, heç bir valideyn icazə verməz ki, bu iş olsun” - deyir ata. Ailə Nərminənin itməsi xəbərini polisə məlumat verdikdən 9 gün sonra qızcığaz tapılıb. O, Bakıda Memar Əcəmi metrostansiyasının yaxınlığındakı “Arzu” şirniyyat evində işləyib. Bu müddət ərzində həmin şirniyyat sexində gecələyib. Şirniyyat sexinin sahibinə qızın evdən qaçmasını onun qonşusu deyib. Qonşu isə Nərminənin fotosunu televiziya ekranında görüb. Qızın axtarıldığını da sexin sahibəsinə qonşu deyib. Bundan sonra polisə zəng vurulub və qız tapılmış hesab olunub. 9 gün ərzində şirniyyat sexinin sahibi azyaşlının onun yanında olduğunu polisə bildirməyib. 

«Qardaşı evdən bayıra çıxmağa utanırdı»

“Mən özüm qızı gətirməyə getmişəm. Onun hardan çxıdığını da özüm görmüşəm. Qadının bizdə telefon nömrəsi də var, ünvanı da. Biz bilirik qızımızı hardan və necə götürmüşük. Onun “spravka”sı da var”- söylədi M.İsgəndərov.

Uşaqların bir-biri ilə yola getdiyini dedilər bizə: “Oğlum onu şalvar geyməyə qoymurdu. Qardaşdı də. Qısa, yaxası açıq paltarlar geyməyə də qoymazdı. Mən imkan verməzdim ki, onu döysün. Deyirdim anası da yanında deyil, qəlbi sınıqdı, qızla işin olmasın. Qızın evdən heç kimə nə isə deməyib getməsi oğluma pis təsir etmişdi. Onu həzm eləyə bilmirdi. Əsəbi uşaq idi”.

Toplaşanlar ailənin qohumu olduğunu, qız tapıldıqdan sonra onunla görüşüb sonra evlərinə getdiklərini deyirdilər: “Bilsəydik belə olacaq onu aparıb öz evimizdə saxlayardıq. Qoymazdıq evdə qalsın. Oğlan da qız getdikdən sonra evdən çölə çıxmadı, özünə qapanıb qalmışdı. Heç siqaret almağa da getmirdi. Çölə çıxmağa utanırdı. Rayon yerində də bu məsələyə çox pis baxırlar. O da gənc uşaqdı, oğlan uşağıdı”.

«Güman etməzdim ki, belə olar”

Polis Əmrahdan izahat da alıb. İzahatda bacısına təzyiq etməyəcəyini yazıb. Ancaq qızın evə dönüşündən 2 saat sonra bacısını öldürüb. Qızı müayinə etdirib ailə qayıtdıqdan sonra. Onun evdən hansısa niyyətlə qaçmadığına əmin olmaq üçün. Hətta qətldən əvvəl qardaş bacısı ilə zarafat da edib ki, “20 manat vermişdim sənə. Xərcləmisənsə halal xoşun olsun”. Həmin 20 manat Nərminənin döşəyinin altından tapılıb. Belə çıxır ki, qız evdən gedəndə qardaşının pulunu götürməyib. 

M.İsgəndərov hadisənin təfərrüatlarını xatırladıqca söhbətə qoşulur: “Həmin gün - qızım evə qayıdan gün oğlum mənə dedi ki, “ata, şəhərdə restoran var. Bibimoğlanları orda işləyir. Hansısa işdən çıxacaq. Sənin xərcin çox çıxıb - qızı axtaranda. Mən başlayaram orda işləməyə sənə də kömək olar” dedi. Bu sözlər məni çox sevindirdi. Güman etməzdim ki, belə olar”.

«Uşaq evə salamat gəlib, əlimizdə kağız da var»

Qohumlardan biri qızın polisə qardaşının onu incitdiyini deməsinin Əmrahın acığına gəldiyini söyləsə də digəri həmin gün Nərminənin evə şalvarda qayıtmasının qardaşına xoş gəlmədiyini bildirdi: “Qız evə şalvarda gəlib. Bizdə elə şey yoxdu ki, o yaşda qız, gəlin şalvar geyinsin. O uşağa da bu, pis təsir edib. Hərənin, hər ailənin də bir xasiyyəti var də. Biz istəmirik bizim qızımız müəyyən yaşdan sonra şalvar geyinsin. Onun kiməsə dəxli var?”...

Digər qohum isə “o şalvara görə deyil. Sadəcə Şamaxı rayonunda hamı bir-birini tanıyır. Uşaq evə salamat gəlib, əlimizdə kağız da var. Amma camaatın ağzını yığmaq olmur. Oğlan da bunu bilirdi. Bizdə belədi də... Uşağın da elə vaxtıdı ki, onunla psixoloqun danışmağı lazım idi” - dedi.

Qardaş -bacı məktəb üzü görməyibmiş

Uşaqların heç biri orta təhsil almayıb. “Əmrah 3 il burda kənd məktəbində oxuyub. Sonra idmanla məşğul olub. Ağır atletika ilə. Qız heç məktəbə getməyib. Fermada olmuşuq. O da orda olub, bizim yanımızda. İndi fermada da Sovetin vaxtındakı kimi məktəb yoxdu. Məktəbin yerində qarpız əkirlər. Mən də uşağımı kimin qapısında qoyum? Biz bura yığışanda qızın artıq 13 yaşı vardı. Onu məktəbə qoymaq istəyəndə getmədi, birinci sinifə gedəcək uşaqların ondan çox balaca olmasından utandı. Oğlum da heç yazı yaza bilmir. Elə yaxşı oxuyan uşaq da olmayıb. Heç danışıq qabiliyyəti də yox idi”. Şəhərin mərkəzində olan kəndin nə yolu, nə də məktəbi var. 

Kəndin məktəbi 4-cü sinifə qədərdi. 4-cü sinifdən sonra isə şəhərin mərkəzində 3 saylı məktəb var. Qış aylarında isə uşaqların şəhərin mərkəzinə dərsə getməsi mümkünsüz olur: “Yollar da çox pis vəziyyətdədi. Bu gördüyünüz daşı-çınqılı da yola qonum-qonşu pul yığıb tökdürüb. Uşaq asfalt yola çıxana qədər uzunboğaz geyir. Yola çıxdıqdan sonra isə onu dəyişib ayaqqabıya keçir. Mağarı quranda da çınqıl alıb tökmüşük. Yolların kənarlarını kanalizasiya çəkənlər qazıb eləcə də qoymuşdu. Elə mərkəzdən bu tərəfə baxsanız yolun kənarlarında işıq dirəkləri də görməzsiniz. Elə bil kənarlarda yaşayan adam deyil”.

İdmançı gəncin önünü rüşvət kəsib

13 yaşından Kiçik Xınıslı kəndindəki evdə yaşayıb Nərminə. İlk dəfə televizoru da o yaşda görüb. Qardaşı Əmrah ağır atletika ilə professional şəkildə məşğul olub. Nəticələri var. Respublika birinciliyində 2-ci yeri tutub. Ölkədəki yarışlarda iştirak edib. Ancaq idmanla məşğul ola bilməyib. Ondan pul istəyiblər, ailə isə bu pulu vermək imkanında olmayıb. Kəndin sosial problemləri ailədən də yan keçməyib. Kənddə su olmadığından suyu pul ilə alırlar. Alınan su da qab-qaşıq, paltar yumaq üçündü. 2 tonuna 10-12 manat verdiyini deyir M.İsgəndərov. İçməli suyu isə kəndin bulağından götürürlər. Nərminənin evdən çıxıb gedəcəyi yerlərdən biri bulaq, baxça, digəri isə hər hansı qonşuya diləyə getmək olub. Bulağa, baxçaya gedəndə də qardaşından icazə alıb. Uşaqlar kiçik ikən atası ilə anası ayrılıb. Bacı-qardaş ataları ilə yaşayıb. Evdən qaçmazdan əvvəl Nərminə və Əmrah bir müddət analarının yanında qalıblar. Anasının yanından qayıtdıqdan bir neçə gün sonra qız evdən qaçıb. 

«Ayaqlarım tutuldu, pilləkənləri qalxmağa gücüm çatmadı…»

\"Əmrah namaz qılırdı. İdmanda müəllimlərindən biri ona namazı öyrətmişdi. Əmrah kobud uşaq idi. Nə deyim, kənd uşağıdı. Qız da oruc tuturdu. Səhər-səhər yerindən qalxıb bir stəkan çay içib, məndən sonra evdən çıxıb\" - deyir atası.

Evdən təkbaşına çıxmayan Nərminənin Bakıya necə gəlməsi də müəma olaraq qalır. Nərminə Bakıya avtovağzaldan yox, dördyol deyilən ərazidən, Bakıya sərnişin aparan taksi ilə gedib. Bunu həmin ərazidə yerləşən video kameralar qeydə alıb. Bakıya 20 yanvara gələn qız sonra da Memar Əcəmi stansiyasına birbaşa şirniyyatçı sexinə gedib. Qonşular da Nərminənin ağır təbiətli qız olduğunu, evlərindən çox az hallarda çıxdığını deyirlər.

\"Qapı dəmir, pəncərələr də plastikdi. Çölə səs çıxmır. Əmrah da arxadan stəkanı qızın başına vurub. Bu zərbədən sonra Nərminə özündən gedib... Mən qızımı görə bilmədim. Ayaqlarım tutuldu, pilləkənləri qalxmağa gücüm çatmadı...\" - deyir M.İsgəndərov.

Heç bir hərəkəti ilə özündən şübhə yaratmayan Əmrah Nərminə ilə tək qalıb və bu vəziyyətdən istifadə edərək bacısını öldürüb. 17 yaşlı bir uşağın bu qətli planlamasına atası da təəccüb edir.

Yeniyetmənin işlədiyi şirniyyat sexinin müdiri nələr dedi?

Şirniyyat sexinin sahibi Aygün xanımla əlaqə saxladıq. Aygün xanım (soyadını demədi) Nərminənin onun yanında 9 yox, 2 gün qaldığını söylədi: \"Onun üstündə heç bir sənəd yox idi. Bizə də heç kimi olmadığını, sənədlərinin dayısıgildə qaldığını, onların da onu incitdiyini demişdi. Bizə də sorğu çatdıqdan sonra ANS-in qaynar xəttinə zəng vurduq, təhvil verdik atasına. Onu qaytaranda da qaçmaq istəyirdi, getmək istəmirdi. Ölümü haqda da televizordan eşitdik. O, bizə ayın 23-dən evdən çıxdığını, mənə də qonşularının sexdə iş olduğunu ona xəbər verdiyini demişdi\".
Aygün xanım Nərminənin onun yanına gələndə ayağında çəhrayı rəngdə tərlik, əynində ağ kofta və qara rəngdə şalvar olduğunu söylədi: \"Mən ona yaxşılıq edib, evimizdə saxlamışam. İstintaqa da məni çağırmayıblar, çağırsalar da gedən deyiləm. Mənlik onda bir iş yoxdu. Mən qızı ailəsinə təhvil vermişəm\". 

Polis günahkardımı?

Şamaxı Rayon Prokurorluğundan Toğrul Qəribovla əlaqə saxladıq. T.Qəribov ailədə konflikt olduğunu polisin bilmədiyini dedi: \"Ailə bizə konflikt olmasıyla bağlı müraciət etməyiblər. Qızlarının evdən getdiyini deyiblər. Polislər də onu şirniyyat sexindən tapıblar. Qızı azyaşlı olduğuna görə ailəsinə təhvil veriblər. Digər məsələlər də istintaq sirridi. Polislərin bu işdə məsuliyyətinin olub-olmaması istintaqın sonunda məlumat veriləcək\".
Həmin günü isə ata belə xatırlayır: “Qızı evə polislər gətirdikdən sonra qohum-əqrabadan da bizdə olanı vardı. Oğlum da dedi ki, Nərminəni də çağırın çörək yesin. Mən də ata kimi sevindim ki, nə yaxşı oğlum bacısına qarşı pis olmadı. Oturduq çörək yedik. Bacılarım, yeznəm də bizdə idi. Orda nə isə olsa idi mən qoymazdım... Mənim həyatım sönüb, iki uşağım birdən gedib...”